اشتكى أهالي سكان طريق الرحى في المنطقة الواقعة على امتداد جنوبي البراد وصولاً إلى صالة كليوباترا من معاناتهم مع مشكلة مياه الشرب التي باتت مشكلة عامة تعاني منها مختلف مناطق المحافظة .

الأهالي وفي شكوى للساعة 25 قالوا ..."صرنا منعرف الحجج والمبررات عند المسؤولين عن هالموضوع... بس نحنا كمواطنين بدنا حل ..بدنا نعيش..بدنا نشرب...يااستاذ بدنا نتحمم أقل الايمان ..لكن إنو نموت من العطش الله بيقبلها... وإذا بدنا نشرب لازم ندفع ثمن الصهريج. الحر يلي أقل شي صار سعرو 40000.لإنو مياه رئيسية صارت من الأحلام.... أو بدنا نسجل على نقلة عند (السيد ...الاستاذ ...المهندس) محمد ابو سرحان حصراً وهوي بيتحكم بالأسماء إيمت بيبعتا على البير .. وهات ليجي الدور وتجي النقلة..أقل شي 10أيام من تاريخ التسجيل هاي إذا ماضاعت اللائحة عالطريق وطارت الأسماء ...".

وأضاف الأهالي .." الموضوع الرئيسي .. من 25 يوم تماماً إجت مرة وحدة المي الرئيسية.... إجت عالعداد 12برميل فقط لاغير يعني مترين ونص ولما تواصلنا مع (السيد) مراقب الشبكة إنو يطوّل مدة الضخ فترة أطول,  قال الظروف مابتسمح..عن أي ظروف قصدو الله أعلم.... ومرت علينا الفترة الماضية..الحر الشديد ..تواصلنا مع المراقب إيمت دور المي قال نتيجة الحرارة ماعم نقدر نشغل المولدة خلال النهار..بالليل فقط..اضطرينا نشتري نقلة حر ب40000 ..وهي خلصنا هلق موجة الطقس الحار وخلصنا مي ...شو منعمل...عم نتواصل معو طلعت حجة جديدة ..زيت مولدة...ماااااافي يعني والله بعدنا ملتزمين بحدود الأدب والذوق والأخلاق إلّي متربين عليها...لكن للصبر حدود.... رواتبنا مابتسمح نظل نشتري نقلات حر... وخاصة بهذا الشهر ...شهر النكبات... بتمنا تنشر على صفحتك تقرير عن مشكلتنا بهالحي يلي سميتو من قبل لحضرتك الحي المنسي".

الساعة 25: سهيل حاطوم